Kommuneplan

Nytt frå neste kommuneval er at kommunestyret i løpet av eitt år etter konstituering skal vedta ein kommunal planstrategi. Denne planstrategien bør omhandla kommunen sine strategiske val når det gjeld samfunnsutvikling, langsiktig arealbruk, miljøutfordringar, dei ulike tenesteområda si verksemd og ei vurdering av trong for planlegging i valperioden.

Kommunestyret skal samstundes ta stilling til om gjeldande kommuneplan skal reviderast eller om planen skal vidareførast utan endringar.

Det er opp til kommunen sjølv å organisera arbeidet med kommuneplanen. Det skal innhentast synspunkt frå statlege og regionale organ og nabokommunar. Det bør òg leggjast opp til ein brei medverknad og allmenn debatt som grunnlag for handsaminga.